Calgary Indoor Soccer

سلام على كل المصريين فى كالجارى. زى ما وعدناكم، هنبدأ الاستعداد للNations cup من دلوقتى..

المباريات الرسمية هتبدأ فى الفترة من مارس 26 حتى أبريل 13

شروط الانضمام :
– يوم 9 فبراير هنعمل try-outs لمرحلتين عمريتين ( مش هعرف اكتبها تانى فركزوا 🙂 ).
– مرحلة 16+ و تحت 35
– مرحلة 35+ .
– مسؤولين عن المسابقه : جمعة محمد و أحمد عربى و اسماعيل حجى و مودى ابراهيم وفادى معلوى
– المكان : Calgary West Soccer Centre
– العنوان : 11014 Bearspaw Dam Rd NW
– الميعاد : 9:30pm – 10:30pm لسن 16+ و تحت35
– من 10:30pm – 11:30pm لسن +35
– قيمة الاشتراك فى ال try-out فقط : 5$
– لينك الدفع : http://www.calgaryegyptians.org/product/soccer-tryouts/
– كل مرحلة عمرية تسجل فى الregisteration form بتاعها. نرجوا الالتزام بالمرحله العمرية.
-بيانات تسجيل الtry-out :
– بين 16 و 35
https://goo.gl/forms/k7izzuTbJhX4QBYA3
– فوق35+ https://docs.google.com/…/1FAIpQLSdYYuOHUp4qcaElts…/viewform

– بعد الtry-out المجموعه المنظمه هتختار 15 لاعب لكل مرحلة عمرية للمشاركة فى البطولة.
– هيتم تبليغ اللاعب اللى وقع عليه الاختيار تانى يوم ( و هنمضى معاه قبل المهندس عدلى القيعى والمستشار مرتضى منصور).
– ممكن نعمل try-out تانى فى اقرب فرصة فى حالة عدم اكتمال العدد المطلوب او طلب الناس لفرصه تانيه عشان ممكن ناس متقدرش تيجى اليوم ده.
– رسوم الاشتراك للاعبين المشاركين فى الnation cup
$120 شاملة الآتى :
1- جميع حجوزات الملاعب للتدريب استعدادا للبطولة
2- تىشيرت منتخب مصر ( أساسى + إحتياطى).
3- دىجى بأغنية بلدنا فى القلوب متشاله وفيلم العالمى فى حالة الفوز بالمسابقة.

– قواعد عامة للمسابقه :
1- الالتزام التام بمواعيد التمارين ( يعنى الحضور التام أو الموت بالزكام).
2- حضور جميع ماتشات البطوله. كل مدرب هيعتمد اعتماد كلّى على اللاعيبه المشاركة( و الموضوع عايز نَفَس زى مانتوا عارفين) . محتاجين كل اللاعبيه… لو مواعيد البطولة مش مناسبه مفيش داعى السنة دى و نشوفك فى الoutdoor

كلمة اخيرة من الجمعية :
– لسن 16+ وتحت 35: أرجوكم احضروا وشاركوا.. نفسنا نشوفكم ونرفع أعلام مصر و نهتف لكم. السنة اللى فاتت عملتم شغل جامد وبشويه توفيق كان ممكن تصعدوا.. نرجوا من كل الحريفه المشاركة واحنا وراكم بالعصايه.. قصدى بالطبله و الأعلام 🙂

– لسن +35 : نداء لكل واحد موهوب من أجيال زمان.. لكل واحد شاف مصر بتتأهل لكاس العالم سنة 1990.. (هانى رمزى بيحضن اشرف قاسم بالعكاز بعد ماتش الجزائر، هشام يكن وهو بيلعبها طويلة لحسام حسن اللى اتكعبل برة المنطقة والحكم حسبها بينالتى، لكل اللى افتكر أن البينالتى مجاش عشان الكاميرا صورتها عالضيق، لجمال عبد الحميد ماسك راسه بعد ما فان بروكلن مسك الكورة، لحسام وابراهيم و هما طالعين بيعيطوا لما اتغلبنا من إنجلترا وخرجنا) .. لكل أبطال الستينات والسبعينات والتمانينات اللى نفسهم يشوفوا اسم بلدهم جنب أى فريق أجنبى فى بطولة جامدة من ساعتها..الفرصه جاتلكم. .. نرجوكم الحضور. عايزين نشجعكم واولادكم تشجعكم بأعلام مصر و تكون فرصة جميلة للتعارف و تقريب الناس و لم الشمل.
– لكل المصريين فى كالجارى : فضّى نفسك وتعالى شجع. تابع أخبار البطوله، هنعمل بث مباشر زى السنة اللى فاتت ونوعدكم بأداء أحسن ونتايج مشرفة.
Asmaa Amer
Mago Benjamin
Sherouk Adel
Amy Ali
Fady Maalawy
Abdelrahman Tork

Image may contain: text